KASİDE DER MEDH-İ HAZRET-İ FAHR-I KÂİNÂT
1 Saçma ey göz eşkden gönlümdeki odlare su / Kim bu denlü dutuşan odlare kılmaz çâre su
Ey göz, eşkden gönlümdeki odlare su saçma kim bu denlü dutuşan odlare su çâre kılmaz.
2 Âb-gûndur günbed-i devvâr rengi bilmezem / Yâ muhît olmuş gözümden günbed-i devvâre su
Günbed-i devvâr rengi âb-gûndur yâ gözümden su günbed-i devvâre muhît olmuş, bilmezem.
3 Zevk-i tîgundan ‘aceb yoh olsa gönlüm çâk çâk / Kim mürûr ilen bıragur rahneler dîvâre su
Zevk-i tîgundan gönlüm çâk çâk olsa ‘aceb yoh kim mürûr ilen su dîvâre rahneler bıragur.
4 Vehm ilen söyler dil-i mecrûh peykânun sözin / İhtiyât ilen içer her kimde olsa yâre su
Dil-i mecrûh peykânun sözin vehm ilen söyler. Her kimde yâre olsa ihtiyât ilen su içer.
5 Suya virsün bâgbân gülzârı zahmet çekmesün / Bir gül açılmaz yüzün tek virse min gülzâre su
Bâgbân gülzârı suya virsün, zahmet çekmesün. Min gülzâre su virse yüzün tek bir gül açılmaz.
6 Ohşadıbilmez gubârını muharrir hattuna / Hâme tek bahmakdan inse gözlerine kâre su
Muharrir; bahmakdan gözlerine hâme tek kâre su inse gubârını hattuna ohşadabilmez.
7 ‘Ârızun yâdiyle nemnâk olsa müjgânum n’ola / Zâyi olmaz gül temennâsiyle virmek hâre su
‘Ârızun yâdiyle müjgânum nemnâk olsa n’ola. Gül temennâsiyle hâre su virmek zâyi olmaz.
8 Gam güni itme dil-i bîmârdan tîgun diriğ / Hayrdur virmek karanu gicede bîmâre su
Gam güni dil-i bîmârdan tîgun diriğ itme. Karanu gicede bîmâre su virmek hayrdur.
9 İste peykânın gönül hecrinde şevkum sâkin it / Susuzam bir gez bu sahrâda menüm’çün are su
Gönül, peykânın iste, hecrinde şevkum sâkin it. Susuzam, bu sahrâda bir gez menüm’çün su are.
10 Men lebün müştâkıyam zühhâd Kevser tâlibi / Nitekim meste mey içmek hoş gelür huşyâre su
Men lebün müştâkıyam zühhâd Kevser tâlibi. Nitekim meste mey, huşyâre su içmek hoş gelür.
11 Ravza-ı kûyına her dem durmayup eyler güzâr / ‘Âşık olmuş gâlibâ ol serv-i hoş-reftâre su
Su, her dem durmayup ravza-ı kûyına güzâr eyler. Gâlibâ ol serv-i hoş-reftâre âşık olmuş.
12 Su yolın ol kûydan toprag olup dutsam gerek / Çün rakîbümdür dahi ol kûya koyman vare su
Toprag olup su yolın ol kûydan tutsam gerek. Çün rakîbümdür, dahi koyman su ol kûya vare.
13 Dest-bûsı ârzûsiyle ger ölsem dostlar / Kûze eylen topragum sunun anunla yâre su
Dostlar! Ger dest-bûsı ârzûsiyle ölsem topragum kûze eylen anunla yâre su sunun.
14 Serv serkeşlük kılur kumrî niyâzından meğer / Dâmenin duta ayağına düşe yalvare su
Serv kumrî niyâzından serkeşlik kılur, meger su dâmenin tuta ayağına düşe yalvare.
15 İçmek ister bülbülün kanın meğer bir reng ile / Gül budagınun mizâcına gire kurtare su
Meger bir reng ile bülbülün kanın içmek ister. Su, gül budağınun mizâcına gire kurtare.
16 Tıynet-i pâkini rûşen kılmış ehl-i ‘âleme / İktidâ kılmış tarîk-i Ahmed-i Muhtâr’e su
Su, tarîk-i Ahmed-i Muhtâr’e iktidâ kılmış. Tıynet-i pâkini ehl-i ‘âleme rûşen kılmış.
17 Seyyid-i nev’-i beşer deryâ-yi dürr-i ıstıfâ / Kim sepüpdür mu’cizâtı âteş-i eşrâre su
Seyyid-i nev’-i beşer, deryâ-yi dürr-i ıstıfâ kim mu’cizâtı âteş-i eşrâre su sepüpdür.
18 Kılmag içün tâze gülzâr-i nübüvvet revnakın / Mu’cizinden eylemiş izhâr seng-i hâre su
Gülzâr-i nübüvvet revnakın tâze kılmag içün mu’cizinden seng-i hâre su izhâr eylemiş.
19 Mu’cizi bir bahr-i bî-pâyân imiş âlemde kim / Yetmiş andan min min âteş-hâne-i küffâre su
Mu’cizi âlemde bir bahr-i bî-pâyân imiş kim andan min min âteş-hâne-i küffâre su yetmiş.
20 Hayret ilen barmagın dişler kim itse istimâ’ / Barmağından virdügin şiddet güni Ensâre su
Şiddet güni Ensâre barmağından su virdügin kim istimâ’ itse hayret ilen barmagın dişler.
21 Dostı ger zehr-i mâr içse olur Âb-i Hayât / Hasmı su içse döner elbette zehr-i mâre su
Dostı ger zehr-i mâr içse Âb-i Hayât olur. Hasmı su içse su elbette zehr-i mâre döner.
22 Eylemiş her katreden min bahr-i rahmet mevc-hîz / El sunup urgaç vuzû içün gül-i ruhsâre su
Vuzû içün el sunup gül-i ruhsâre su urgaç her katreden min bahr-i rahmet mevc-hîz eylemiş.
23 Hâk-i pâyine yetem dir ‘ömrlerdür muttasıl / Başını daşdan daşa urup gezer âvâre su
Su ‘ömrlerdür muttasıl hâk-i pâyine yetem dir başını daşdan daşa urup âvâre gezer.
24 Zerre zerre hâk-i dergâhına ister sala nûr / Dönmez ol dergâhdan ger olsa pâre pâre su
Su, zerre zerre hâk-i dergâhına nûr sala ister. ger pâre pâre olsa ol dergâhdan dönmez.
25 Zikr-i na’tün virdini dermân bilür ehl-i hatâ / Eyle kim def-i humâr içün içer meyhvâre su
Meyhvâre def-i humâr içün eyle kim su içer, ehl-i hatâ zikr-i na’tün virdini dermân bilür.
26 Yâ Habîballah yâ Hayrel-beşer müştâkunam / Eyle kim leb-teşneler yanup diler hemvâre su
Yâ Habîballah, yâ Hayrel-beşer! Leb-teşneler yanup eyle kim hemvâre su diler, müştâkunam.
27 Sensen ol bahr-i kerâmet kim şeb-i Mi’râcda / Şebnem-i feyzün yetürmiş sâbit ü seyyâre su
Ol bahr-i kerâmet sensen kim şeb-i Mi’râcda şebnem-i feyzün sâbit ü seyyâre su yetürmiş.
28 Çeşme-i hûrşîdden her dem zülâl-i feyz iner / Hâcet olsa merkadün tecdîd iden mi’mâre su
Merkadün tecdîd iden mi’mâre su hâcet olsa çeşme-i hûrşîdden her dem zülâl-i feyz iner.
29 Bîm-i dûzeh nâr-i gam salmış dil-i sûzânuma / Var ümîdüm ebr-i ihsânun sepe ol nâre su
Bîm-i dûzeh dil-i sûzânuma nâr-i gam salmış. Ebr-i ihsânun ol nâre su sepe, ümîdüm var.
30 Yümn-i na’tünden güher olmış Fuzûlî sözleri / Ebr-i nîsandan dönen tek lü’lü’-i şehvâre su
Ebr-i nîsandan lü’lü’-i şehvâre dönen su tek, Fuzûlî sözleri yümn-i na’tünden güher olmış.
31 Hâb-i gafletden olan bîdâr olanda rûz-i haşr / Eşk-i hasretden tökende dîde-i bîdâre su
Hâb-i gafletden bîdâr olan rûz-i haşr olanda; eşk-i hasretden dîde-i bîdâre su tökende;
32 Umduğum oldur ki mahrûm olmayam dîdârdan / Çeşme-i vaslun vire men teşne-i dîdâre su
umduğum oldur ki dîdârdan mahrûm olmayam, çeşme-i vaslun men teşne-i dîdâre su vire.
